【震驚全人類！】初級經理：「我對下屬仲好過對老婆仔女！」

　　「我對下屬仲好過對自己老婆仔女！」呢句說話，出自一個初級經理把口。大家聽到佢呢句說話，無不藐咀藐舌，甚至細細聲講：「真係多謝你對我咁好喎！」。今次，我反而想為初級經理平反一下，希望各位打工仔都可以體諒一下所謂「上司」。 

　　需知道有種公司十分賤格，隨便幫你升個Title，加你少少人工。目的，為了留人。而今次的主角Ivan，亦因為被公司挽留而升職為初級經理。老實說，錢，輕微增加，但工作量卻暴增，同時又要處理十多個下屬的事，真是「唔升好過升」！而且直屬的下屬又曾經是自己的同事，當然對Ivan敬畏較少、無禮較多。所以，升職「萬歲」走唔甩之餘，更多次被下屬左屈右屈。 

　　「唉，有時我真係好後悔點解當日唔走。」 

　　「咩事啊？好多嘢做啊？」 

　　「錢又唔多，工作量又多咗，仲要成日陪高層開LUNCH MEETING，食埋啲貴嘢。」 

　　「唔使開會嗰陣自己食平少少慳唔慳到啊？」 

　　「我直頭自己帶飯添啦！男人老狗帶飯盒你估好睇乜？仲要慳慳埋埋，畀班細屈餐下午茶又冇咗。」

　　「上面嗰啲拒絕唔到，唯有向下面埋手咋喎！」

　　「埋條命咩？班友仔都唔當我上司，屈得就屈，唔妥協真係分分鐘罷工啊。不過而家都已經成日罷工……」

　　原來因為下屬是昔日的同階級同事，大家一早老友鬼鬼。你一個人升職？有人暗地裏「葡萄」，將你下派的工作做得馬馬虎虎，等你慢慢執手尾，甚至由得你因為負責的工作做得太「求其」，被高層責罵；又有人恃住同你曾經出生入死，有甚麼對自己不利的工作，就「搭膊頭、幫幫手」，完美把工作卸回給Ivan。

　　雖說Ivan是因為接受了公司升職的Offer，又騎不住班細的，才導致如斯田地。但其實公司最底層的人，未算最慘。最慘的是，如Ivan般「上有高堂，下有妻房」的中下層，受盡上、下級的欺凌。既不可以「拍拍蘿柚」唔做射畀人，又要看著上頭的面色做人。最慘是，人工其實又不比原來的多很多，但人人都以為你「上咗岸」，可以隨便屈都得。此刻，我真的相信，Ivan對下屬比對自己的家室更好。不過，路係自己揀，點行自己選擇吧。